صورة من الزمن الجميل
زمان لما كنا ف البلد وصغيرين
والانس يحلى بالغلابه الشقيانين
بعد العصاري ومن غير قهاوي
تسمع غناوي وكتير حكاوي
والانس يكمل بشمس الاصيل
والشاى بيطلع مع قلة تسقع
والضحكة صافية تملا العنين
ينسوا التعب ينسوا الالم
على الحب دايما متجمعين
وكمان تلاقي فيه ناس بتلعب
قاعدين ع السيجة مربعين
مكر ودهاء ولعب وتسالي
ناسيين تعبهم راميين همومهم
والبسمة دافية والكلمة حكمة
دلوقتي نادرة في المتعلمين
تسمع مشورة ونصايح امينة
من ناس كبيرة راسية ورزينة
هيبه ووقار بنحبهم وبقتدار
وعم مرسي في حضنه كرسي
على كتفه شايل صندوق بفرشة
عمال ينادي وعليه يخبط ورنيش
والحاج لطفي قاعد وصبحي
فوق المصطبه مستأنسين
على صدره فوطه مخططه
ودقنه مغطيها صابون كتير
قاعد بيحلق والدم ينقع
وعمال يزعق حلاق غشيم
وشباب جميل فرشين حسير
وعلى الطبلية كوتشينه بلدي
وشيش بيش وجمهور يصفق
شويه طاولة وشوية ضمينوا
وشويه تلاقي مستعرضين
بالقوة يلعب بدراعة رست
وفريق يهلل على الخسرانيين
زمان لما كنا ف البلد وصغيرين
صورة من خيال / محروس الحناوي
