شاكر عماره
خلونا نتكلم مع بعض كده في كذا نقطة :
◆ أولا : احنا شوفنا عدد كبير من التكفيريين (120 – 150 تكفيري) اللي كان واضح جدا انهم مقاتلين محترفين ( من ضمنهم اجانب )تلقوا تدريبا احترافيا على وسائل الاقتحام والمهاجمة وعلى استعمال مختلف أنواع الأسلحة التقيلة والمتوسطة ، وحتى على أساليب التسلق على الجدران ..الناس دول أكيد يعني ما أتولدوش كده مدربين ، وأكيد برضه ما أتجمعوش مع بعض كده بالصدفة ، وما ينفعش تقنعني ان دول شوية من أهالي سينا الغاضبين من ممارسات الجيش المصري فقرروا يلموا نفسهم ويدخلوا في مواجهات مع أقوى جيش في المنطقة بعمليات احترافية بالشكل ده .. دي ناس مدربة تدريب عالي جدا وبشكل احترافي ، وأكيد فيه «كيان» بيجمعهم مع بعض في شكل «تنظيمي» صارم ..مرتباتهم بكام وتدريبهم بكام ومصاريف نقلهم و تهريبهم للبلد بكام
.
◆ ثانيا: نتكلم بقا في مصاريف معركة زي اللي شوفناها دي ..
★ انت عندك عدد 15 عربة دفع رباعي ( وفي بعض الروايات 30 سيارة) والعربية الواحدة من دول تمنها لا يقل عن 750 ألف جنيه ، يعني بنتكلم في حوالي عشرة مليون جنيه على أقل تقدير تمن وسائل النقل فقط
.
★ عندك كمان أكتر من نص طن متفجرات من مادة الـ «C4» شديدة الانفجار ، ودي مادة باهظة الثمن ومش متاحة في السوق كده عادي لأي واحد عايز يشتريها ، دي مادة متاحة فقط لجيوش الدول ، ومش كل الدول كمان .. يعني احنا بنتكلم في حوالي 2-3 مليون جنيه تمن هذه المادة المتفجرة لوحدها
.
◆ نيجي بقا للتسليح ، واللي تراوح بين مدافع النص بوصة المضادة للطائرات والمحمولة على ظهور السيارات ، وبين مدافع الأر بي جي ومدافع الجرينوف متعددة الطلقات ، نزولا حتى الرشاشات الألية «الكلاشينكوف» كتسليح شخصي للأفراد الارهابيين
● عارف تمن المدافع الواحد من مدافع النص بوصة ده كام ؟
● طاب تمن «الجرينوف» الواحد كام ؟
● طاب تمن العبوة الناسفة الواحدة كام ؟
● طاب تمن «الكلاشينكوف» اللي هو أصغر قطعة سلاح كانت مع الارهابيين كام ؟
.
◆ بلاش دا كله .. عارف حتى تمن طلقات كل سلاح من دول كام ؟
▪︎ عارف مثلا قذيفة الأر بي جي الواحدة بكام ؟
▪︎ طاب عارف تمن قذيفة الهاون بكام ؟
▪︎ طاب عارف تمن طلقة المدفع النص بوصة المضاد للطائرات بكام ؟
▪︎ أو عارف تمن طلقة الجرينوف الواحدة كام ؟
★ يكفي انك تعرف انك عشان تملا خزنة رشاش الكلاشينكوف «AK47 -7,62X39» اللي هو أصغر سلاح استعمل في الاشتباكات فده هيكلفك حوالي ألفين جنيه ، واحنا بنقصد هنا تمن الطلقات اللي تملا الخزنة مش الخزنة نفسها ..شوف بقا كام طلقة استعملت وكام خزنة كلاشينكوف استهلكها الارهابيين في معركة زي دي
◆ وأخيرا كلنا شوفنا الارهابيين بيستعملوا أجهزة لاسلكي للتواصل فيما بينهم
▪︎ يا ترى عارف تمن جهاز اللاسلكي الواحد كام ؟؟
.
✪ احنا بنتكلم في معركة اتكلفت على الأقل 100 مليون جنيه ..
★ طيب فكر كده وقوللي ، يا ترى الارهابيين جابو الفلوس دي كلها منين ؟
وخللي بالك دي مجرد معركة واحدة من مئات وربما آلاف المعارك اللي خاضتها التنظيمات الارهابية دي ضد جيشنا وضد دولتنا على مدار الـ 7 السنين اللي فاتت
◄ يا ترى مين اللي بيصرف على دا كله ؟
★ أوعى تقوللي ان دي من تبرعات أهل الخير واللا من فائض صناديق النذور اللي في أضرحة أهل البيت ، لأحسن كده هزعلك وهجيب ناس تزعلك
.
